Philosophie.
Wie dir scho unserer Gschicht entnee könnet, dien mir gärn Feschter und Aaläss plane und duurefiehre. In unsere Statute isch dr Zwäck vom Verein folgendermasse definiert:
Der Verein bezweckt:
S'Prinzip isch relativ simpel: Mir sinn e Truppe, wo gärn aarisst und organisiert. Will d'Grössi vo unsere Feschter für privati Aaläss nümm geignet isch, hänn mir uns rächtlich welle absichere und ebbe dr Verein gründet. Für euch änderet sich nit vyyl, aber mir könne neu unter eim Name ufträtte, e gmeinsams Bankkonto fiehre und Verträg im Name vom Verein abschliesse. Au hafte duet neu dr Verein als juristischi Person.
Für unseri Events isch kei Rahme vorgee, aber nodüürligg hänn mir scho e gwüssi Vorstellig, wie die öppe usgsee wärde. Unserem Alter und de Interässe entsprächend söll immer e luschtigs und fröhliggs Ambiente herrsche, wenn mir mitenand fyyre und Gschichte erlääbe. Für Aggtivmitglieder wird unser Vereinslokal regelmässig offe ha. Dört drifft me sich uf e Füüroobebier, me jasst e Rundi, luegt e Fuessballmatch, besiedlet die wunderschöni Insle Catan, wirft paar Dartpfiil ufd Schiibe oder losst sini Fründe bim Döggele abe.
Passivmitglieder nämme drgege nur an grössere Events teil. Drunter verstöön mir unseri Bierpongturnier, Casino-Ööbe oder kleineri Partys in unserem Lokal. Uns schwääbe aber au usswärtigi Events vor, wie öbbe e Go-Kart-Renne, Paintballschlachte oder Daagesusflüg im In- und Ussland.
Uns alli verbindet aber no ei witeri Faszination: D'Stadt Basel. Mit unserem Verein wänn mir s'kulturelle Lääbe pfläge und uslääbe. Mir freue uns jetzt scho, wenn mir wider könne go rhyschwimme, über d'Herbschtmäss schländere, em FCB zuejuble (oder uns drüber närve) und d'Fasnacht erlääbe.
Wenn mir ehrligg sinn, schaffe mir uns zurzyt dä Ruum, wo mir im Jugendalter drvo dräumt hänn. Au jüngere Generatione wänn mir die Möglichkeit biete. S'Mindeschtalter für unsere Verein isch zwar uff 18 Joor feschtgleggt worde, aber mir stelle unseri Rüümlichkeite au gärn für Privataaläss zur Verfiegig. Näbe eifache Geburtsdaagspartys oder andere Feschter, sölle au die ganz Glaine zum Zug koo. Mir dängge drbii an e Quartiertheater, Baschtelnomidääg oder Filmööbe.
Hänn mir di Interässe gweggt und möchtisch du di im Vereinslääbe als Mitgliid yybringe? Denn zögere nit und mäld di bi uns. Mir sinn offe für kreativi Köpf mit neue Idee!
Der Verein bezweckt:
- die regelmässige Organisation und Durchführung von Anlässen und Events verschiedener Art
- die Pflege und Prägung des Kulturlebens in der Region Basel
- die Pflege regionaler sowie nationaler Traditionen
- die Pflege von Freundschaften
S'Prinzip isch relativ simpel: Mir sinn e Truppe, wo gärn aarisst und organisiert. Will d'Grössi vo unsere Feschter für privati Aaläss nümm geignet isch, hänn mir uns rächtlich welle absichere und ebbe dr Verein gründet. Für euch änderet sich nit vyyl, aber mir könne neu unter eim Name ufträtte, e gmeinsams Bankkonto fiehre und Verträg im Name vom Verein abschliesse. Au hafte duet neu dr Verein als juristischi Person.
Für unseri Events isch kei Rahme vorgee, aber nodüürligg hänn mir scho e gwüssi Vorstellig, wie die öppe usgsee wärde. Unserem Alter und de Interässe entsprächend söll immer e luschtigs und fröhliggs Ambiente herrsche, wenn mir mitenand fyyre und Gschichte erlääbe. Für Aggtivmitglieder wird unser Vereinslokal regelmässig offe ha. Dört drifft me sich uf e Füüroobebier, me jasst e Rundi, luegt e Fuessballmatch, besiedlet die wunderschöni Insle Catan, wirft paar Dartpfiil ufd Schiibe oder losst sini Fründe bim Döggele abe.
Passivmitglieder nämme drgege nur an grössere Events teil. Drunter verstöön mir unseri Bierpongturnier, Casino-Ööbe oder kleineri Partys in unserem Lokal. Uns schwääbe aber au usswärtigi Events vor, wie öbbe e Go-Kart-Renne, Paintballschlachte oder Daagesusflüg im In- und Ussland.
Uns alli verbindet aber no ei witeri Faszination: D'Stadt Basel. Mit unserem Verein wänn mir s'kulturelle Lääbe pfläge und uslääbe. Mir freue uns jetzt scho, wenn mir wider könne go rhyschwimme, über d'Herbschtmäss schländere, em FCB zuejuble (oder uns drüber närve) und d'Fasnacht erlääbe.
Wenn mir ehrligg sinn, schaffe mir uns zurzyt dä Ruum, wo mir im Jugendalter drvo dräumt hänn. Au jüngere Generatione wänn mir die Möglichkeit biete. S'Mindeschtalter für unsere Verein isch zwar uff 18 Joor feschtgleggt worde, aber mir stelle unseri Rüümlichkeite au gärn für Privataaläss zur Verfiegig. Näbe eifache Geburtsdaagspartys oder andere Feschter, sölle au die ganz Glaine zum Zug koo. Mir dängge drbii an e Quartiertheater, Baschtelnomidääg oder Filmööbe.
Hänn mir di Interässe gweggt und möchtisch du di im Vereinslääbe als Mitgliid yybringe? Denn zögere nit und mäld di bi uns. Mir sinn offe für kreativi Köpf mit neue Idee!